Ukraine: Ibitero byo mu kirere bya Russia byibasiye Kyiv mu ijoro ...
Ahavuye isanamu, Kyiv City Military Administration
Abategetsi bavuga ko amagorofa abiri yo hejuru yasenyutse muri iyi nyubako y'i Kyiv
30 Ukwa gatanu 2023, 03:53 GMT
Vyavuguruwe Haciye amasaha 3
Ibiturika byumvikanye i Kyiv n'inyubako nyinshi zirashya nyuma yuko Uburusiya bugabye igitero kuri uyu murwa mukuru wa Ukraine mu ijoro rya gatatu ryikurikiranya.
Abategetsi bavuga ko ibisigazwa by'ibisasu ari byo byateje uwo muriro, ubwo ubwirinzi bw'ikirere bwa Ukraine bwahanuraga indege nto zitarimo umupilote (zizwi nka drone) zirenga 20. Nibura umuntu umwe byatangajwe ko yapfuye.
Igisirikare cya Ukraine kirwanira mu kirere kivuga ko cyahanuye misile zose hamwe na drone zo mu bitero bibiri byabanje bya nijoro Uburusiya bwagabye kuri Kyiv.
Mu murwa mukuru Moscou (Moscow) w'Uburusiya, igitero cya drone cyangije ibintu bicyeya ku nyubako nyinshi, nkuko byavuzwe n'umukuru w'uwo mujyi.
'Mayor' wa Moscou Sergei Sobyanin yavuze ko "serivisi zose z'ubutabazi bwihuse z'umujyi" ziri aho icyo gitero cyabereye.
Yongeyeho ko "kugeza ubu nta muntu n'umwe wakomeretse cyane".
Ibindi bintu – harimo n'igisa nk'ikibuga cy'indege cya gisirikare – byarashweho mu tundi turere twa Ukraine.
Ku wa mbere, abategetsi bo mu karere ka Khmelnytskyi ko mu burengerazuba bwa Ukraine bavuze ko indege eshanu zangiritse mu kigo cya gisirikare.
Abategetsi bongeyeho ko inzira inyuramo indege aho hantu ubu yamaze gusanwa, ariko nta yandi makuru batanze.
Perezida wa Ukraine Volodymyr Zelensky yashimye ubwirinzi bw'ikirere buzwi nka Patriot iki gihugu cyahawe n'Amerika.
Mu butumwa bwe bwo mu buryo bwa videwo bwo ku wa mbere nijoro, yavuze ko ubwo bwirinzi butuma Ukraine "ihanura 100% misile izo ari zo zose z'Uburusiya".
Ahavuye isanamu, Kyiv City Military Administration
Zelensky yongeyeho ati: "Uburusiya burashaka gukurikira inzira y'ikibi kugeza ku musozo, kugeza ku gutsindwa kwabwo, kuko ikibi nta wundi musozo cyagira utari ugutsindwa. Isi igomba kubona ko iterabwoba ririmo gutsindwa".
Igisirikare cy'Uburusiya cyavuze ko cyarashe aho cyashakaga hose mu bitero byacyo byo muri iki gihe cya vuba aha gishize byibasiye Kyiv n'indi mijyi yo muri Ukraine.
Ibivugwa n'impande zombi zirwana ntabwo byagenzuwe mu buryo bwigenga.
Hagati aho, Jenerali Majoro Kyrylo Budanov, umukuru w'ubutasi bwa gisirikare bwa Ukraine, yaburiye ko hazabaho igisubizo cyihuse ku bitero by'Uburusiya.
Ahavuye isanamu, Reuters
Imodoka nyinshi zashenywe muri kamwe mu turere tw'i Kyiv
Ahavuye isanamu, Reuters
Mu maso ya bamwe mu baturage b'i Kyiv hagaragaraga uburakari no kudatezuka
Ahavuye isanamu, Reuters
Abaturage b'i Kyiv ubu bamaze kumenyera ibitero biba hafi buri munsi
Ubutegetsi bwa gisirikare bw'umujyi wa Kyiv bwatangaje ko inyubako eshatu zahiye muri iki gitero kindi cya nijoro cyo mu kirere.
Busubiramo ibiri mu makuru y'ibanze, bwavuze ko drone z'ubwiyahuzi zirenga 20 zashenywe muri iki gitero.
Iki kibaye igitero cya 17 ku murwa mukuru wa Ukraine kuva mu ntangiriro y'uku kwezi kwa Gicurasi (5), harimo n'igitero cy'imbonekarimwe cyo ku manywa cyabaye ku wa mbere.
Uburusiya – bwagabye igitero gisesuye kuri Ukraine kuva mu kwezi kwa Gashyantare (2) mu 2022 – bwagiye bukoresha izizwi nka drone z'ubwiyahuzi (cyangwa 'kamikaze drones') hamwe n'ibisasu bya misile zo mu bwoko bwa 'cruise' na 'ballistic'.
Abasesenguzi bamwe bavuga ko Uburusiya burimo gushaka gushegesha no kwangiza ubwirinzi bw'ikirere bwa Ukraine, mbere y'igitero kimaze igihe cyitezwe cya Ukraine cyo kugarukana (gusubiza inyuma) abasirikare b'Uburusiya.
Ukraine imaze amezi itegura icyo gitero, ariko byayisabye igihe gihagije cyo guha imyitozo abasirikare bayo no kubona ibikoresho bya gisirikare yahawe n'ibihugu by'inshuti zayo byo mu burengerazuba (Uburayi n'Amerika).
